十大潮語，承載記憶
香港自6月9號嘅反《逃犯條例》示威遊行，6月12號警民衝突，至今各種抗議仍然持續。呢場為期甚久嘅社會運動，正經之餘，亦不乏網民嘅搞鬼嘅討論，特別係針對唔同場合活動之中，衍生咗相當多嘅金句潮語，大量咁喺網路使用、改編。有幾句衰少少嘅，好似記者俾人地問候母親，警察對住示威者唔知講「豬」定「自由」，呢種大家都心照嘅，所以今日唔講呢兩粒字喇！潮語睇落唔正經，其實正係代表咗呢次事件各種唔同面向，仲會成為之後大家承傳記憶嘅重要字眼，好值得細細檢視。今日DailyView就嚴謹地用網路大數據細數網民對「逃犯條例」衍生嘅十大潮語！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 我係真心㗎
——真心都要強調？
警察署署長盧偉聰喺6月13號，為咗回應6月12號嘅警民衝突，召開咗記者會。因為唔少記者喺金鐘一帶都受到唔友善嘅對待，佢哋驚到戴哂頭盔咁出席記者會，呢個場面相當搞笑，引起咗網民熱烈討論。更無厘頭嘅係，盧署長講咗好多金句，唔止英文講「Can't find the Right word」，仲叫在場嘅記者朋友「大家唔好笑」，仲強調「我係真心㗎」，周星馳都拍唔出喇！
image source:
9 叫你個耶穌落嚟見我哋
——唔通呢位人兄係上帝？
香港好似係特別受到神關注嘅地方，唔止有人收到上帝指示出嚟選特首，仲可以「叫你個耶穌落嚟見我哋」，認真神靈充滿。6月12號，有宗教人士集會，不斷高唱聖詩，相當神聖、嚴肅。不過可惜都阻唔到警方嘅清場，佢哋仲對在場嘅牧師唔友善，連耶穌都得罪埋。皆因有牧師控告警方，話佢哋對基督教人士講：「叫你個耶穌落嚟見我哋」，連人哋信仰都得罪，點收科？
image source:
8 大和解
——今次無大台！
香港之前嘅社會運動，成日都有人批評，都係大台控制哂，拍吓手掌唱吓歌，好似嘉年華會咁就完咗，成日階段性勝利，根本無用。又有另一堆人會話，最緊要係和平、理性、非暴力，邊個衝邊個就係鬼！勢估唔到，今次反送中事件，呢兩派人竟然大和解，互相合作，兄弟爬山各自努力咁喎！兩派大和解，得益始終係市民，無咗大台，先係市民自發嘅真聲音。
image source:
7 一個都不能少
——二百萬，加一
香港反送中，一個都不能少。一個都不能少，包含嘅意思可以好多，例如特首林鄭月娥道歉，港星杜汶澤就講：「市民訴求一個都不能少！」又或者藝人森美喺佢IG講，要大家珍惜生命，因為香港人一個都不能少。其實，一個都不能少嘅意思，或者係功成不必在我，成功必定有我。二百萬香港人嘅遊行，都承載咗一個人嘅精神，從來，都無少過一個人。
image source:FB/草日漫畫
6 Do You Hear the People Sing
——When tomorrow comes
香港雨傘運動唱「今天我」，但到咗反送中示威運動，好似係以英文歌為主，其中《Do You Hear the People Sing》，更係今次嘅主打歌！連93歲嘅填詞人Herbert Kretzmer都知道香港人唱呢首歌，接受《每日郵報》訪問，話好開心見到世界各地都有用呢首歌反抗當權者，仲認為香港人好勇敢。佢仲強調，雖然佢唔係現場，但會同港人同聲高唱，希望永遠在明天！
image source:
5 毅進制
——進入毅進南北朝
香港自古以來都有一個相當大嘅謎題，就係只要每逢遊行呢，警方宣布遊行人數同發起團體嘅統計數字，往往都係差天共地。維基百科就有個幽默嘅條目：「毅進制（英語：Yijinecimal，縮寫：YJ）是一個隨時間、政治環境而演變的特殊進位制，常用於捏造統計數字、估計人數等等。」入面仲有埋詳盡嘅計法，講到似層層咁，難怪大家都成日用呢個潮語喇！
image source:
4 血債票償
——市民流哂血唔係白流
香港遊行好少咁多人，亦都好少會發流血衝突。冰封三尺，非一日之寒。市民日積月累嘅不滿，好似火山咁爆發出嚟，愈係打壓愈係燒得火紅。身體受過嘅痛，曾經流過嘅血，或者係呢刻都未得到應有嘅回應。但香港人識得放長雙眼，已經有好多人話，我哋咁多人，要佢哋血債票償，係下次立法會選舉挫對方銳氣！香港人嘅血，唔會白流嘅！
image source:
3 唔好搞我後面
——而家無人搞你後面呀
6月12號，金鐘地鐵站有大批警員出現，突然針對出站嘅市民搜身，仲要佢哋排埋牆邊好似罪人咁比人哋睇！好彩有唔少議員即時到場支援，質問在場嘅警察到底有咩問題，用咩標準去搜咁多市民嘅身。其中大律師楊岳橋問到個警察口啞啞，突然轉頭向身後自己嘅手足大叫：「唔好搞我後面！」點知原來根本無人搞佢。網民話睇怕係驚到有幻覺噃。
image source:
2 不撤不散
——我哋最堅決嘅訴求
由6月9號講到而家，一句從未改變，最具力量嘅單一訴求，不撤不散。即係，只要香港政府一日唔撤回《逃犯條例》，香港市民係一日都唔會散水，一日都唔會放棄抗爭。我哋可以見到，香港人的確做到不撤不散，無論面對嘅係輿論壓力，無論面對嘅係警方武力，都依然不斷努力，係黑暗之中開拓出光明。只要一日未撤回，呢句都會不斷存在。
image source:t_palette.house
1 Sing Hallelujah to the Lord
——聖詩嘅力量！
6月11號晚上，金鐘集會響起一陣莊嚴、神聖嘅歌聲，一句又一句嘅Sing Hallelujah to the Lord，淨化咗在場無數人士嘅內心，給予佢哋係困難之中依然向前嘅動力，令人相當感動。聖詩唔單止係心靈力量，更加係一道保護示威者嘅政治盾牌，因為按照法律，所有在公共場所嘅宗教集會都唔係違法，警察唔可以驅散。正因為咁，聖詩嘅大愛，變成香港人心中堅實嘅信仰，仲出埋佛教版。
image source:
十大潮語，時代之鏡
今次反送中運動衍生嘅十大潮語，唔單止係得個笑字，入面係笑中有淚，入面係淚中沾血，反映咗一個時代嘅變化。香港嘅抗爭，唔再兒戲，深受國際關注、欣賞。香港人唔再政治冷漠，二百萬人，大家齊心協力討論、支持。呢十個潮語，將會成為香港史之中入面嘅重要詞語，作為時代之鏡，反映出香港人獨有嘅精神。
分析說明：
本研究資料由《KEYPO大數據關鍵引擎》提供，分析時間範圍為2019年05月23日至2019年06月21日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『反送中潮語』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
