跨越考試地獄，要靠補習名師
香港有咩嘢特別出名？出名考試內容難，入大學比例低囉！由CE、AL到而家嘅DSE，一首綠袖子成為香港學生嘅集體惡夢，聽到首歌就即刻想作嘔咁滯。由細到大成個社會都同我哋講，公開試影響終生，考得唔好，無大學入好羞家架。今日嘅DSE仲要係一試定生死，壓力自然爆哂燈。咁除咗平時係學校努力讀書，仲有咩方法取得佳績呢？補習名師 is our only way out！點解香港補習名師咁受歡迎？因為我哋真係要靠佢哋幫手對付呢隻DSE怪獸囉。補習就好似一支強心針咁，等我哋面對考試更加有信心。如果無咗佢哋，學生一定會更加迷茫、無助。你又知唔知邊十個香港補習名師最多人講？今日就等DailyView用網路大數據話你知喇！
DV小教室：香港網路大數據觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source:爵爵&貓叔IG
10 Cliff Yeung，遵理經濟
——佢曾經出過卷俾好多學生考試
Cliff Yeung，可能係咁多位補習名師入面最熟出卷嘅人！點解？皆因佢曾經係考評局入面做嘢，係前考評局科目主任及評核發展部經理，仲親自管理通識科及經濟科公開試。未完！佢係全港唯一真正參與過DSE課程設計嘅名師。正所謂知己知彼，百戰百勝，Cliff Yeung真係連考評局肚入面條蟲諗緊咩都知，教學生答題，貼吓考試題目，真係話都無咁易喇！
image source:遵理學校
9 Billy Ng，英皇英文
——齊齊屈住DSE英文機！
以2017、2018連續兩年全港及遵理英皇DSE英文科最多5**、5*、5嘅光榮，Billy Ng已經以後進之輩嘅姿態，隱隱然變成全港英文補習名師之霸！更加誇張嘅係，佢係2014、15、16、17、18連續五年DSE7科5**狀元之師。哇大佬，一次就話可能係好彩啫，連續五次，已經係真金不怕洪爐火，真珠都無咁真嘅實力證明！佢咁後生，相信仲有大把發圍機會，成就無可限量
image source:英皇教育
8 C.W. Sham，遵理物理
——四十幾年嘅教學經驗
C.W. Sham，沈楚煒，係做全職補習名師之前，佢曾經喺喇沙書院做過老師，之後捲入官非，搖身一變轉做遵理物理補習名師。計埋以前係中學教書，到而家已經有四十幾年經驗，真係相當老牌資歷。佢嘅教學特色，除咗有非常詳細嘅Notes，仲會自創物理金句，好似教靜電特性咁，「正負相吸，如膠似漆」、「遙遙相對，互相陶醉」，好鬼生動搞笑，即刻入哂腦。
image source:FB C.W.SHAM
7 Dr. Guy Leung，遵理通識
——我愛Guy Sir 叔叔
唔好以為得林作先有高學歷，Dr. Guy Leung仲威，哈佛大學公共行政博士後，研究中國能源經濟，仲同前澳洲總理Mr Kevin Rudd報告。博士後已經係讀書可以讀到嘅頂點，想知佢嘅讀書精神？「考試只為求分數，做人只須心地好。」係佢教導學生嘅金句，相當有道理。學術有成就，教書亦都好出色，勁多學生都讚爆佢，咁有料到唔怪得咁多人排住隊報名啦。
image source:遵理學校
6 J. Yeung，遵理通識地理
——名門正宗，破盡記錄
HKU畢業雙主修心理學同地理，之後仲修讀埋通識嘅教育文憑，真係上知天文下知地理咁屈機。J. Yeung有咩咁把炮？佢2011年首創香港補習界喺會展舉辦千人模擬試，震撼全港，後面嘅人都陸續參考佢嘅模式。J. Yeung嘅補習經驗相當豐富，好多網民都會喺論壇話，佢簡直係補習界嘅清泉，無咩造作，無咩刻意搞花樣宣傳。之所以咁熱門，無原因他，型加實力囉。
image source:截圖自YoutubeTVC I Jyeung Beacon
5 廖天恩，英皇通識
——親身考返個DSE5**返嚟
好多人做學生嗰陣，都曾經想問老師：「你而家考試會攞咩分？」如果係廖天恩嘅話，佢會馬上答你：「我會攞5**呀！」無錯，佢喺2015年考DSE通識輕輕鬆鬆就5**。其實佢早就喺香港高級補充程度會考(ASL)通識A咗，仲難過DSE，佢會再考嘅原因係為咗證明佢從不Outdate！佢嘅實戰經驗咁勁，緊係成日貼中題目喇，仲喺2017 DSE成為四位七科5**嘅狀元之師。
image source:英皇教育
4 劉冠華，現代英文
——5**Kris Lau班房
Kris Lau近排因為文憑試保密資料捲入官非，係蕭源之後第二單咁嘅事件，好多人都留意件事嘅結果。不過講返呢件事發生前，佢嘅補習班成績相當厲害，係現代教育英文奪5**比率最高嘅英語教學碩士名師，仲試過喺一年之內教出11位DSE英文科5**嘅狀元！Well，根據過去歷史，佢仲貼中咗好多年DSE嘅題目題型，有網民甚至話佢為學生而惹上官非，真係好偉大！
image source:IG krislaudse
3 林作，遵理IELTS
——可能係娛樂圈學歷最高嘅人
林作，最廣為人知嘅事係同港姐麥明詩以前嘅戀情，其次就緊係佢牛津大學畢業，學歷完全係世界級菁英水平！佢最初返香港做律師，又喺老牌大律師樓張奧偉大律師事務所工作。不過林作唔止只係做律師咁簡單，仲要簽約走諧星路線殺入娛樂圈。後嚟放棄咗大律師資格，決定同遵理學校簽約十年，負責IELTS 課程講師同海外升學顧問，以佢嘅能力，Easy job
image source:IG jolamchok
2 林溢欣，遵理學校
──欣師恩情深似海
DSE係香港學生第一個大關口，佢唔止係考試咁簡單，仲涉及到「人生」、「未來」依D咁沉重嘅問題，真係好大壓力㗎！喺依個時候，學生好需要一盞明燈指點，引領前進。而對於好多中六學生嚟講，林溢欣就係依盞燈！補YY LAM，除咗學到考中文嘅技巧、思維，仲會聽到好多考試以外，有關人生各方面嘅道理、知識，唔怪得咁多人都尊稱佢做「欣師」啦！
image source:FB Yat Yan Lam
1 Calvin Sun，現代英文
——最多公開試考生選報嘅英文科補習老師
Calvin Sun個名，我細細個已經成日聽喇！佢教英文嘅威名，我諗應該全香港學生都知，就算無上過佢堂，身邊總有一個係左近，然後英文突飛猛進咁。所以話Calvin Sun係補習界英文之王，絕對名符其實嘅。咁多年嚟佢嘅學生加埋，超過8,000個考獲Lv5**、5* 、5，仲首創「Logic Line Analysis」教學法，學得輕鬆，唔需要死背，呢種老師，真係太屈機喇！
image source:嘉勳教育世界最正名師，真係超英趕美
本地插畫家爵爵&貓叔曾經畫過一張台港補習名師嘅對比圖，有趣嘅係，香港嘅補習名師係有型靚女好多，網民留言都話好中好搞笑。其實縱觀全世界嘅補習老師，可以做到香港咁有公關形象，咁後生咁吸引，我就真係數唔出喇！香港嘅補習名師個個都係實力派，同時又偶像派，宣傳貼地，但有時西裝骨骨，海報似足明星。入得課室，出得大堂，又真係付出咗好多心機，真係抵佢哋咁紅咁受學生歡迎嘅！香港，係補習名師質素方面認真係世界頂尖。
分析說明：
本研究資料分析時間範圍為2018年05月15日至2019年05月14日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港十大補習界名師 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
