鼠年來到，雲文子師傅以奇門遁甲同大家推算一下2020鼠年三個運勢最弱的生肖，包括馬、鼠、兔，如果大家想改善弱勢，就要留意有咩可以幫助增強運勢。
肖馬
屬馬朋友喺鼠年沖犯太歲，運勢方面自然比較多波折。無貴人相助又要承受各方各面嘅衝擊﹐變數多阻滯多好難成大事，所以唔適宜做任何大決定或者計劃，例如轉工或者做生意，都會好容易做錯決定。至於桃花指數就係12個生肖之中最弱，就好似在一個乾旱的沙漠裡面尋找水源的機會一樣微弱。盡快擴闊社交圈子就會遇到你的意中人。
增運貼士︰大家可以戴狗形或虎形飾物去化解沖犯太歲， 著紅色、綠色衫，或者配戴一些鎖鏈形飾物有助增旺運勢。
肖鼠
屬鼠朋友本命年值太歲，運勢比較多阻滯、多病痛，好容易招惹是非官司，記住 言行要小心。而鼠年會出現一些虛象﹐好容易被人呃，唔適宜做一些新發展和投資。至於工作壓力都係大，小心會有低層次錯誤出現。鼠年犯太歲當然有好多爛桃花，千祈唔好妄想可以在娛樂場所碰到意中人或者真愛，因為好容易遇到情場殺手！
增運貼士︰嘗試去人多熱鬧的地方，例如喜慶宴會等，去沾旺一下運勢；另外亦可以戴牛形、猴形、龍形的飾物去化解犯太歲。多著一些綠色、白色衫，或者配戴星星形飾物或圖案，亦有助增旺運勢。
肖兔
屬兔朋友會鼠年刑太歲，代表刑傷咁解，小心會有血光之災或者官非出現。至於工作亦唔係咁順，公司內憂外患，會遇到麻煩客戶，應該少說話多做事，盡量避免同人爭執。雖然壓力比較大，但唔好亂發脾氣，可能會影響整體運勢。鼠年桃花運都係比較低沉而唔穩定，擇偶條件太高係你的致命傷，千祈唔好妄想會搵到一個完美對象，對你真心真意先至係最珍貴！
增運貼士︰大家可以戴狗形飾物去化解刑太歲，多著紅色或者黑色衫，配戴一些直條形飾物或圖案就可以增旺運勢。
Follow she.com on Facebook & Instagram
