【體路專欄】足球比賽「得中場，得天下」，呢句係我成日講嘅說話，搶贏中場有助控制比賽節奏，對比賽勝負有主導權。以往足球比賽崇尚進攻，直到1994年世界盃，當屆冠軍巴西隊隊長鄧加喺中場主要負責攔截及掃蕩，除咗確立防守中場嘅地位及重要性外，令各支球隊開始參考佢嘅踢法，令球員開始模仿，令教練開始培訓防守中場，可以話係「防中始祖」！
攔截型（Ball Winner）— 干堤、安迪迪
「牡丹終須綠葉扶持，場上付出無人知！」防守中場顧名思義喺中場上負責防守，做好多dirty work，利用攔截保護防線及盡量降低對手進攻危險性。球員特性上較為積極及進取，喺場上尋覓每一個搶截機會，因此所需覆蓋範圍甚廣，對球員體力要求極高。當中所指嘅體力並非單純涉及跑動距離，包含身體對抗力量，要同敵人衝衝撞撞，再維持一定頻率跑足全場，絕對唔簡單。不過，球員四周圍進行搶截而忽略咗個人位置感嘅重要性，或會對球隊陣地防守體系有所影響。
隨後策劃型（Playmaker）— 佐真奴、華拉堤
隨著足球開始講究團隊合作，每個位置每個球員都需要清楚知道自己場上責任，防中演繹亦開始再唔單止講求搶波，更要懂得策劃進攻。Playmaker球員特質需要穩定地提供高質素控傳球及護波能力，後防球員視佢為第一傳球目標，作為防線同中前場球員橋樑。由於大多數喺後防心臟地帶開始組織，利用短傳將個波由後場運送到前場，加上球員大多面向自己球門，稍有差池就令對手得到明顯入球機會。因此，球員要對周邊環境及情況瞭如指掌，嘗試打開身體角度同時兼顧個波及敵人，更要知道自己嘅safety zone，隨時連人帶波帶到最安全位置。
控制型（Holding Midfield）— 巴斯基斯、洛迪靴蘭迪斯
控制型防中踼法同隨後策劃型類近，但需要更全面地顧及球隊進攻同防守，控制攻守節奏。球員意識形態上較為保守，傳波進取程度較隨後策劃型低，甚少上前參與進攻之餘，當球隊進攻時，要預計「被反擊」位置進行搶截，因此球員需要非常了解當時球賽狀況從而有目的地作出預謀。此外，與隨後策劃型最大分別在於無球跑動（Off Ball Movement），透過喺適當位置出現，即時堵塞球隊場上漏洞，當中涉及補位（Cover）、遮線（Screen The Pass）、攔截（Tackle）及捕捉第二落點（Second Ball）嘅細節，令球隊攻守達致平衡。
防中完美形 — 費蘭甸奴、卡斯美路
防中完美型嘅定義係球員具備以上3個類型特質，而且能夠穩定地靈活運用，因應戰術轉移自己喺球場上功能，近乎完美姿態勝任。要成為完美型其中一個關鍵因素係時間性，幾時要攔截、補位、延遲對方進攻、甚至犯規等等，要喺適當時候做適當決定絕不容易，而呢啲細節往往成為世界級球員最大分野。經驗有助了解及處理場上唔同情況，身經百戰先可以達到爐火純青境界，做到真正嘅進可攻，退可守！
要兼顧四面八方而來嘅敵人，視野要清晰，頭腦要冷靜。防守中場位置喺無名英雄，看似簡單其實好難嘅工作，當中牽涉無數細節，例如現身攞波時間性、控球質素、傳球力量及線路、對比賽預計、閱讀球賽能力等等，全部都要求甚高，要做到無微不至。「台上一分鐘，台下十年功」，各位球迷下次對防守中場嘅時候，不妨留意下以上嘅細節，感受一下當中嘅難度。
此篇文章由「體路 Sportsroad」最初發表於「【體路專欄】同一位置類型多 究竟你會學邊個 — 防守中場篇」
《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/
