就快結婚的倪晨曦(Elva)日前已經同一班姊妹身處夏威夷Maui島舉行婚前單身Party，飲紅酒又學跳夏威夷舞，為答謝老友，準新娘送答謝卡畀佢哋。日前，就見到Elva一個人去銅鑼灣買咭，離開時見佢打咗個大乞嚏，佢用手臂掩口，好有公德心。採訪:梁志明倪晨曦好快就同拍拖三年、從事金融的男友Vincent結婚，兩人由求婚到影婚紗相走勻全世界，有錢就係任性。近日準新娘到夏威夷搞派對，母親、妹妹及兩名姨甥女率先抵達，姊妹團朱韻韻及鍾浠文亦會參與倪晨曦婚前陽光與海灘單身Party。
結婚係煩㗎
Elva亦特別為出席單身Party的好姊妹準備咗小禮物，就係印上佢哋個名嘅浴衣及答謝卡。日前傍晚，素顏Elva獨自去銅鑼灣Times買多謝咭，因為就嚟結婚，婚禮好多鎖碎嘢要記，所以Elva一臉思考樣，揀咭唔係揀太耐，好快就揀到，然後講住電話去畀錢，再行去搭的士，多嘢煩真係有樣睇，唔信望吓Elva個樣。
