陳熙蕊（Blossom），今年26歲，係今屆港姐嘅友誼小姐，無印象唔緊要，佢已跟TVB簽約，未來應該不時會喺TVB見到佢。日前傍晚6點，家住銅鑼灣百德新街嘅陳熙蕊約咗兩位今屆落選港姐去屋企附近食Cake，吹水講笑講足兩粒鐘，友誼小姐果然好識Social，全程勁多表情，表情仲好鬼浮誇，𠱁到兩位朋友好開心。採訪:梁志明陳熙蕊喺比賽中算突出，佢先憑出色口才獲得港姐限量珍藏迷你版后冠及權杖，然後再奪得「友誼小姐」名銜。事前曾被睇好入三甲，連上屆港冠軍陳曉華都睇好佢，話佢好可愛又好有自信，最後得個友誼小姐獎，唔緊要啦，贏到友誼咪仲珍貴，有錢都買唔到呀。
咁多表情會唔會易有紋
當晚六點，陳熙蕊同朋友喺百德新街嘅Lady M食蛋糕，三人選坐室外位，三個女人一坐埋就傾到停唔到，陳熙蕊發言量都好多，仲要係一講嘢就好興奮好多動作，有時舉手有時會繞住女友人隻手，最爆笑係佢啲表情，非常誇張，不時乸埋一舊，堪稱彈弓面，好適合做綜藝節目。快樂吹水兩粒鐘，由陳熙蕊請客，走前三人自拍，影一張唔滿意再影，離開時三人平排而行繼續傾，好多嘢講。
