請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

娛樂

【頭條獨家】及時離疫輪執身彩 隔離期滿似「放監」 黎芷珊超巿瘋狂掃貨

星島日報

更新於 2020年02月26日13:26 • 發布於 2020年02月26日13:00
滿載而歸

自我隔離一個月,芷珊出關後超市狂掃貨,手持兩大袋戰利品打道回府,一臉滿足。
心繫工作

芷珊出關後,第一時間處理公事。
營養食物

狂掃至愛的水果、蔬菜,芷珊揀牛油果手勢熟練。
1月20日黎芷珊在日本橫濱上過鑽石公主號郵輪,回港後得知同船有人確診。當日她跟新聞之花張寶華、才子陶傑同行。
開心旅程

芷珊姐姐喺日本玩完再上船返港。
好友慰問

老友楊千嬅都有致電關心。
逆境求生

市道慘淡,好彩有老友陳奕迅力撐,戴她公司眼鏡。
平淡生日

因應疫情,芷珊姐姐唔打算今年慶生。
精明消費

芷珊好細心咁研究漂白水成份。
兒童偶像

芷珊姐姐跟周星馳、張國強、譚玉瑛都係兒童節目出身。

停泊於橫濱的鑽石公主號郵輪爆發集體感染新型冠狀病毒肺炎,累計超過600人受感染,不少返港接受隔離人士,亦有確診個案。疫症喺郵輪集體大爆發前,早於1月20日黎芷珊在日本橫濱上過該郵輪,5日後抵港,平安落船。不過,回港後得知原來跟80多歲男患者同船,她為人為己主動留家隔離,「閉關」足足一個月,今周二部(25日)芷珊終於安心「出關」,當日本報記者野生捕獲她快閃現身九龍灣及清水灣,除咗急急去辦點公事外,仲到超市補充大量日用品及食物,精神爽利的芷珊姐姐接受電話訪問時興奮道:「好開心,好有放監feel,今次件事真係執身彩呀!」採訪:方騫平、譚壹致、李維隆周二早上11時多,本報記者喺九龍灣mega box停車場內,竟然見到戴住黑超、白口罩,一身黑衣裝束的芷珊獨留車上,未幾有個疑似她眼鏡公司的男員工送來兩袋物件經她簽收。之後她駕車返回清水灣住所附近的超市購物,記者所見,冇出街成個月的芷珊好似放監咁,喺超市逗留近一小時,幾乎每行貨架都睇過,對所有貨品都感興趣,最後買咗蔬菜、水果、芝士、牛油、通粉、乳酪、雞蛋、牛奶、栗米片等營養食品,還有日用品如洗手液、滴露及貓沙等,期間又細心留意漂白水、消毒抹手紙成份,但就冇撲到廁紙,戰利品幾乎塞爆個車箱,真係大豐收。芷珊姐姐經過一個月隔離休息,隔住口罩都feel到她精神更飽滿,亦因她包到冚,置身超市都唔多起見,所以可以free爆咁shopping。
讚政府跟進足夠
事後記者聯絡芷珊愕然道:「係呀!今日第一日出街,所以好開心,有放監feel,幾乎唔識得開車呀!仲買咗夠用個幾兩個月嘅食品同日用品。」黎芷珊延遲隔離期,她強調係自願做法,「見到有啲患者喺14日隔離期後先確診,咁多少都有啲憂慮,更加唔想咁快出街我會嚇親人,提出自我再隔離多14天會較穩陣,跟進我個案嘅姑娘表示支持話『咁就最好啦,肯定冇事!』其實我喺上周六(22日)經已完成晒第二輪隔離,姑娘話係最後一次打畀我話『OK㗎啦!』。喺跟進方面,政府都做得OK,每隔1、2周就有人打嚟問狀況,亦有提供24小時支援服務。」大難不死諗起都驚
由落船至今,芷珊姐姐冇頭暈身㷫,雖然已進入「安全期」,但她仍然關注疫情及其他乘客情況,「原先因為有工作做,所以好好彩咁揀咗個5日短trip,我有朋友旅程較長,搞到一家大細滯留郵輪上,幸好全家驗測結果係陰性可以拎到行街紙,佢哋冇坐政府包機返港,反而選擇留喺日本自我隔離。喺今次事情上,我梗係算好好彩,個個朋友都打嚟,包括楊千嬅話我『死好命!執身彩!大難不死…』其實都係嘅,諗返件事真係好危險,尤其是好似困獸鬥咁將乘客隔離喺密不透風嘅船艙內,咁點會冇交叉感染呢?喺船上嘅隔離做法真係錯到不得了,搞到好多乘客有無妄之災。」
減少社交唔慶生
芷珊姐姐於下月1日54歲牛一,她預先張揚會響應政府呼籲減少社交,暫停生日飯局,「好多朋友約我食飯,不過我都話心領喇!減少人群聚集好過啦!一年半年唔慶祝啫。暫時最快3月尾先有工開,喺疫情下經營嘅眼鏡店短時間內營業額係有增長,但整體生意都係差,唔會入咁多貨,𠵱家成個市都慘淡,但我堅持唔裁員,唔減薪,始終疫情會過去,唔通到時又請返人咁煩咩!反正公司人小小,應該仲頂得住。」

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0