銅鑼灣書店前店長林榮基，在《逃犯條例》修訂的威脅下，昨日離開香港前往台灣，望長期定居，他接受《立場》專訪時表示，形容自己是「流亡」離港，一切迫於無奈，「引渡條例，我呢啲被通緝，擺明一通過就死得，一定拉上去，我唔走唔得」，他表示從未想過，作為香港人會有流亡的一日，「香港沉淪得太快」。台灣陸委會發言人邱垂正表示，已核准他在台灣停留一個月，若要長期居留可依法申請。詳見相關報道。
林榮基形容《逃犯條例》修訂是「將大陸法律拎嚟香港用」，政府一直強調法庭會把關等完全不可信，「香港政府而家係信唔過架！」他呼籲香港人星期日上街遊行，反對《逃犯條例》，「03年上街有無用？係證明咗有用，唔去睇有意思嘅嘢，就一味去否定，話無用無用，你自己唔去做就梗係無用」。
林榮基昨日離開香港，目前身在台北在酒店暫住，他表示抵達台灣後心情已經和在香港不同，雖然當地都有類似愛國同心會等大陸組織，但已經不需再提心吊膽，「今朝起身出街，都唔使擔心左望右望」。
他形容《逃犯條例》修訂，等於將大陸法律套用到香港，「唔止係我一個仆街，而係所有香港人都仆街」；修訂一旦通過，他這種被大陸通緝的人「一定出事」，但佢可怕是無人知道自己是否被大陸「通緝」，「你知唔知你有無被通緝？你唔知，佢唔會話俾你聽，但當你過海關，就會拉你埋一邊，話大陸政府通緝緊你，唔俾你出境，按新引渡條例等大陸提供證據，將你引渡去大陸。」而這個過程，完全是「合法」，「而家係將法律當做武器」。
政府在推銷《逃犯條例》時，經常強調香港法庭會把關，條例亦保障人權，但林榮基就認為，這些說詞完全不可信，「大律師公會，各法律團體所有提出嘅疑問，佢有無解答？佢點解唔答，因為答唔到，你解答唔到嘅嘢，你叫香港人相信？」他批評，特區政府和北京承諾香港人有普選，結果承諾落空，根本毫不可信，「我唔明點解香港人仲可以信佢。」
他認為問題的關鍵，是大陸的司法制度完全是黑廂作業，「你睇我經歷就知，罪名係唔需要審訊，我無見過法官，無辯護律師，佢話你有罪就有罪，精神虐待到我幾乎自殺。」而在他眼中，香港法庭所謂的「保障」，同樣不可信，「你睇睇九子判刑，同太陽花學運有無唔同？明明係無罪就話佢有罪，墮落到咁啦香港」。
林榮基一再呼籲，香港人盡力抵抗惡法，星期日的遊行應該站出來發聲，「香港再沉淪落去，每一個香港人都有責任，你要去反抗」。
守護言論與新聞自由。立場新聞，寸步不退。
每月贊助支持立場新聞
