最近尖沙咀開咗個靚靚新商場──K-11 Musea，天生已有Shopping基因的兔兔就趁放假晨咁早捉咗懶訓熊大嚟到Shopping、打卡呃Like。
但兔兔發現，今時今日，尖沙咀街頭的人流稀疏，遊客蹤影少之又少，好多名店唔使排隊就可以入去買嘢。而熊大當日亦唔使花時間搵位泊車，即使個新商場喺尖沙咀旺區，一入去就即刻泊到車。
根據入境處資料，10月1日至7日黃金周期間，有逾234萬旅客人次訪港，按年跌逾三成。
兔兔：黃金周期間旅客少咗，對邊個行業有最大影響？
熊大：黃金周係本地零售業的傳統旺季，遊客少咗，對依賴自由行購物的零售業自然影響最大。截至今年8月，本地零售銷售已連跌7個月。加上市場多個不明朗因素影響，除咗零售業，各行各業近月的生意亦明顯轉差，唔同行業都掀起裁員結業潮。
兔兔：雖然近排經濟唔係咁好，好多人都要勒緊褲頭、節衣縮食，不過我的Shopping基因依然好強勁，特別係對啲唔係好貴的消費品，如唇膏、面膜等的護膚化妝品。我覺得即使經濟再差，女人都要有返支靚唇膏。一支唇膏貴極都係兩三百蚊。塗啲唇膏，臉色好啲，人都精神啲，咁樣反而令人更有經濟安全感。
熊大：其實無論經濟好定唔好，女人都會化妝，尤其係搽唇膏，因為可以產生粉飾作用，經濟學上又稱之為「唇膏效應」（lipstick effect）。
兔兔：女人鍾意買唇膏都關經濟學事！？
熊大：唇膏效應係形容經濟差的時候，個個人收入都下跌、生活壓力好大，但仍然有強烈的消費慾望。但係就唔會買貴價的奢侈品，反而想將手頭上的「閒錢」買啲唔貴而又非必要的消費品，希望可藉此放鬆吓心情，對消費者起到一種安慰作用。
兔兔：呢個理論咁得意，查實有冇根據㗎？
熊大：唇膏效應喺歷史上的確有根有據。1990年至2001年，美國經濟衰退，但化妝品呢個行業仲有人工加。2001年美國經歷「9.11襲擊」後，當年唇膏銷量倍升；1996年，日本經濟衰退，知名影星木村拓哉代言的一款唇膏依然賣到斷市；還有，2008年金融海嘯期間，市面上唔同牌子的化妝品賣得好好，相反其他高價的奢侈品銷量則強差人意。
兔兔聽完呢個「唇膏效應」理論後，更加大安旨意拎住熊大畀佢的附屬卡喺商場內買多幾支唇膏。呢一刻，熊大真係有少少後悔同兔兔解釋「經濟差，就要買支唇膏去安慰自己」的理論。
最後，小編只好安慰返熊大一句：「女人天生個個都係購物狂，熊大，你接受現實吧！」
