蔣嘉瑩囝囝果真大膽。

蔣嘉瑩(Vivian)與老公Louis早前在新冠肺炎疫情未爆發前,趁兒子Marvis學校放假,一家三口飛往泰國布吉島曬太陽及游水,盡情吸收陽光精華對抗疫情,全家皆曬得一身古銅健康膚色回港。
Vivian表示只要學校放假都會同老公一齊帶兒子去不同地方旅行,希望孩子能放眼世界,看多些其他地方新事物;今次揀布吉島,她說:「主要唔想去太遠地方,玩幾日就算,Marvis好鍾意沙灘及燒烤,我哋又有朋友住布吉島,可以順道探望朋友。我哋喺布吉,日日都係陽光與海灘,因為回港後我要開工影靚相,隨身帶著太陽油,每隔幾小時就由臉到腳趾都塗滿太陽油驚曬黑。」
今次行程囝囝Marvis玩得最開心,他們帶囝囝四圍遊覽,包括:睇老虎近距離同老虎拍照,又到大象保護區參觀幫大象沖涼,最利害是只得5歲的Marvis跟老虎合照時完全唔驚,Vivian笑言:「完全估唔到我個仔係咁大膽,同老虎影相一啲都唔驚,我哋去睇海豚,佢同海豚影相亦完全唔怕,參觀大象時知道可以幫大象沖涼,佢仲一支箭標去幫大象沖涼,係一隻好大的象,唔係BB象喎,佢真係膽大過大人。」

Comment 0