提起尹天照，不得不提《我和殭屍有個約會》，當年他憑住該系列紅極一時，就算劇集事隔多年後重播，仍然獲不少觀眾追捧，令他的人氣長期高企。近年他把事業重心北移，不少人都希望可以可以再見到尹天照返港拍劇，但他接受苑瓊丹訪問時，就表示因為電視台的制度，令他卻步。
日前尹天照接受苑瓊丹邀請，現身《開工大吉77》。他指當年離開電視台外闖，可惜老闆股票失利，令計劃觸礁：「我返去Sell林伯，佢都決定開拍，好在收視好好，拍完之後我就出去再闖搵食、返內地拍戲。決定離開都冇話啱定錯，就當你鋪排得好好，依家又會點？依家間電視台都唔喺度啦。」尹天照坦言有其他電視台接洽，奈何制度令他放棄簽約：「初步傾都知自由度有問題，算啦都過咗去。」
提到當年他曾在片場「發脾氣」，尹天照說：「當年試過一次拍戲，剛剛先拍完第一Take，點知個助導走埋嚟第二稿、第三稿，我心諗我做比你！我將每一稿嘅優點溝埋演比你，但最終啲人都同你玩反面。其實呢啲嘢冇啱定錯，我冇後悔過。作為一個演員，如果冇火嗰角色唔會好睇，但係火得滯可能會影響其他人，點樣火點樣拿捏就要靠時間。」
尹天照稱他的性格因宗教而改變：「我嘅改變係因為我依家嘅宗教，當時太太有病，我搵唔到任何嘅方法去幫佢，咁啱有個朋友，佢有癌病但決定唔再睇醫生，我鬧佢痴線，佢就同我分享教會見證，我就去教會睇吓搵個當事人，因為呢一件事，我認為唯一出路就係靠耶穌。」
