為咗齊心抗疫，今時今日乘搭交通工具，大家都例必戴口罩上車，但誓估唔到就連交通工具本身都戴埋一份！話說日本北海道札幌市嘅路面電車，日前竟然戴上口罩亮相，並將如此趣怪嘅造型照於札幌市交通事業振興公社官方Twitter發布，隨即成為網絡熱話，唔少網民留言大讚好合襯及超可愛！如此有趣嘅安排，其實係想帶出乘搭路面電車時要戴口罩嘅訊息，而且有關方面精心挑選於1950~1960年代製造、充滿懷舊感嘅人氣電車（分別係210形211號車及240形241號車），特色係車頭燈似足一對眼睛，戴上口罩感覺零舍Cute！至於口罩方面，則採用要廢棄嘅膠水管及塑膠桌布製作，就算意外掉下，亦唔會對交通安全構成影響！不過要親身碰上口罩電車其實有一定難度，事關36輛路面電車當中，只有兩架會載上口罩，而且有關方面並唔會安排每日有相同車輛特定行駛，所以能夠碰上嘅機會係十八分之一，可謂相當講彩數！
網址：https://twitter.com/stsp_jpn
東網網站 : https://on.cc/
東網Facebook專頁 : https://www.facebook.com/onccnews/
