去日本旅行,你會發現唔少地方嘅坑渠蓋,都畫有靚靚嘅繽紛圖案,當中唔少更成為旅客專程朝聖嘅對象。不過,時代不斷進步,就連坑渠蓋亦不斷進化,啱啱埼玉縣所澤市就有發光嘅LED坑渠蓋登場!話說所澤市嘅上下水道局喺2018年已將坑渠蓋開發作為廣告燈箱用途,今時今日終於成事!令人驚喜嘅係,首次使用呢種發光坑渠蓋落廣告嘅株式會社KADOKAWA,便為旗下嘅《新世紀福音戰士》、《機動戰士Gundam THE ORIGIN》、《Keroro軍曹》、《涼宮春日的憂鬱》及《五星物語》等超過20套大熱動漫及輕小說作宣傳,每套作品至少會出現一個發光坑渠蓋,而設置地點位於11月6日開幕嘅綜合設施所澤SAKURATOWN與JR武藏野線.東所澤站之間嘅道路,動漫迷晚上到此一遊,肯定勁有Feel!值得一提,呢款LED坑渠蓋利用太陽能作能源,而且照亮街道亦有助減少罪案發生嘅功能,諗落絕對值得推廣。
網址:https://tokorozawa-sakuratown.jp/
東網網站 : https://on.cc/
東網Facebook專頁 : https://www.facebook.com/onccnews/