陳彥行（行姐）日前帶同愛犬接受老友苑瓊丹（苑仔）主持香港開電視節目《開工大吉77》訪問，當年行姐與苑仔因為合作拍處境劇變得老友鬼鬼，直呼對方做「老苑」：「我所有嘅事佢都好知道，佢可以話係我第二個阿媽，周不時幫我留意筍盤，有一次佢帶隻狗睇醫生，見個獸醫幾靚仔，走去問人哋結咗婚未，話想介紹畀我識！睇怕第日我有幸嫁得出，都要跪地斟茶畀佢報恩。」
行姐話初入電視台時，思想比較單純，被苑仔取笑做大小姐，行姐話她被媽咪控制自己多年，終於到三十歲時「反叛」過獨立生活。而二人片場結緣，苑仔係義氣仔女。苑仔就話希望行姐釣到金龜，奈何對方對狗更有興趣：「𠵱家約佢食飯佢都唔出嚟，不時要照顧呢隻狗、帶另一隻睇醫生，睇嚟都要搵個獸醫老公畀佢，順便慳番啲醫藥費。」
