政府防疫一直歎慢板，市民亦唔滿意政府遲遲先向全民派發口罩。議員陳克勤批評政府當初聲稱會向市民再派發銅芯口罩濾芯，但到依家都未見影。
政府5月初推出銅芯口罩，話可以耐洗60次。克勤話，由第一批領取口罩嘅市民計算，口罩濾芯早已超出使用壽命，而政府當初推出口罩時，明明預告會畀市民定期替換濾芯，以確保維持防疫效果，但到依家都未見當局提出替換濾芯嘅安排。
克勤狠批政府推行政策虎頭蛇尾，質疑政府有冇心服務市民，仲話已經去信有關當局，促請政府安排換「芯」。
睇嚟政府推行抗疫工作唔單止慢幾拍，仲要實行唔到承諾，視市民生命為無物。其實唔少政府高官，包括特首林鄭月娥都有使用銅芯口罩，唔通濾芯過期都照用？定係高官有特權，有無限量口罩同濾芯替換呢？
東網網站 : https://on.cc/
東網Facebook專頁 : https://www.facebook.com/onccnews/
