請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

新聞

政Whats噏:證秘書處冇逼員工政治表態 行管會摑譚文豪一巴

on.cc 東網

更新於 2020年07月07日12:47 • 發布於 2020年07月07日12:47 • on.cc 東網
梁君彥話經調查後,秘書處要求員工政治表態嘅指控唔成立。(陳嘉順攝)
梁君彥話經調查後,秘書處要求員工政治表態嘅指控唔成立。(陳嘉順攝)

立法會秘書處早前被指要求員工作政治表態,公民黨(公文袋)議員譚文豪曾陪同事主召開記者會,並聯同另外4位議員去信行政管理委員會,要求跟進事件。行管會主席梁君彥今日(7日)就話,秘書處已會見投訴人同相關職員,行管會經詳細考慮後,認為指控並唔成立,決定唔會就事件再作跟進咁話喎。想當日譚文豪大鑼大鼓開記者會,仲要實牙實齒講到確有其事咁,行管會今次決定唔單止還秘書長陳維安清白之外,仲大剃譚文豪眼眉!

話說譚文豪舊年5月召開記者會,指立法會秘書處喺2017年7月,曾經透過1名保安主管,要求大約15名立法會保安員填寫問卷,交代佢嘅政治立場到底係屬於「藍絲」(支持建制派),抑或係「黃絲」(支持民主派),其中1名女保安員拒絕表態後,一直被人針對,最終因為抵受唔住壓力而辭職。

譚文豪嗰陣仲話,手頭上有證據可以佐證事主嘅講法,但就話現階段唔方便透露,仲話希望留待調查時先至公開資料。佢仲要求行管會委任獨立委員會調查事件,仲揚言話唔排除會引用《立法會(權力及特權)條例》調查咁話喎。

行管會今日朝早召開會議後,梁君彥下晝見記者時就交代呢項投訴嘅調查結果。梁就話行管會早前已指示秘書處就相關指控搜集資料,而秘書處喺搜集過程中,曾經分別約見咗19名相關人士,包括投訴人,以及佢曾經提及過嘅秘書處職員,並邀請佢哋提交書面陳述同其他資料,以助行管會就事件進行討論。

不過,梁君彥話行管會經過詳細考慮所有搜集到嘅資料後,就覺得冇證據支持相關指控,所以就裁定相關指控並唔成立,亦毋須再作跟進咁話喎。梁仲話,秘書處其實早喺舊年6月底時,已經完成咗搜集資料嘅工作,但因為行管會一直未有機會討論同總結調查,所以拖到依家先公布到調查結果。

查實陳維安舊年都有回應相關事件,佢當時已經講過秘書處從來都冇要求任何員工作政治表態,又重申政治中立係秘書處嘅核心價值同行事原則。今次行管會嘅決定唔單止還陳維安清白之餘,同時仲摑咗譚文豪一巴,等佢唔好再屈得就屈喇!

東網網站 : https://on.cc/

東網Facebook專頁 : https://www.facebook.com/onccnews/

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0