開埋本周三(15日)最後1次大會,呢屆立法會就結束。喺過去4年立法會審議嘅法案及議案,而根據一眾議員嘅投票紀錄,發現投棄權票最多嘅首4名議員都喺民主黨(白鴿黨)議員,排榜首嘅係林卓廷,共有120次投棄權票,而最多次喺投票時缺席嘅係公民黨(公文袋)法律界議員郭榮鏗。
根據立法會嘅公開資料,截至上周嘅大會,總共進行936次表決,投棄權票五甲當中,榜首係林卓廷,其黨友許智峯(峯鴿)以112次排第2位、第3位係鄺俊宇佔97次,身兼黨主席嘅胡志偉則以96次排第4位,而第5位係熱血公民嘅鄭松泰。
之但係,4名白鴿黨議員嘅棄權票多數投喺議員修訂上,反而政府議案同動議,每人投嘅棄權票唔多於40次。
白鴿黨投棄權票嘅政府議案,包括《2018年撥款例草案》二讀同三讀、食物及衞生局就《私營骨灰安置所條例草案》,喺全體委員會審議階段所提嘅第二組修正案,仲有喺委任張舉能做下屆終審法院首席法官嘅議案。
郭榮鏗喺主持內務委員會正副主席選舉不停拉布,令內會停擺逾半年,而佢係缺席投票最多嘅議員,總共有479次,即係喺過去4年,逾半表決都冇現身;而最多出席會議但冇投票嘅議員就係佢嘅黨友譚文豪,共有26次,主要涉及《2017年撥款條例草案》部分修正案。
東網網站 : https://on.cc/
東網Facebook專頁 : https://www.facebook.com/onccnews/