普遍民主派區議員都會喺街上掛上政治宣傳橫額，原本呢啲橫額申領發還開支係好難獲批，甚至有市民反對當區民政事務處發還開支添，但俗語話「你有張良計，我有過牆梯」，原來部分民主派區議員諗計將橫額分開組件去申請發還開支，搞到民政事務處都冇晒符。
有消息透露，原來部分民主派區議員已經唔用沿有做法印製橫額，佢哋為咗確保成功申領到發還開支，寧願麻煩啲將橫額拆件咁申請。佢哋嘅「高招」係買塊空白嘅白色橫額，再將其他組件如膠索帶等「濕星嘢」分開申領，而且有部分材料直情唔申領添，費事要同民政事務處交代咁多，唔想畀人問長問短咁話。
雖然民政事務處「失守」，但部分橫額就被地政總署要求移除，原因係展示嘅宣傳品要符合署方發出嘅「路旁展示非商業宣傳品管理計劃實施指引」，規定列明議員展示嘅宣傳品必須遵從香港法律，包括唔可以展示淫褻或意識不良內容。所以話呢，政府部門在民生問題上就最叻互相卸膊，但講到呢啲大是大非問題就自動補位，難怪市民有咁多不滿喇。
東網網站 : https://on.cc/
東網Facebook專頁 : https://www.facebook.com/onccnews/
