歌手菊梓喬（Hana）呢排趕拍無綫劇集《刑偵日記》，日前佢喺社交網嘅限時動態中，上載咗張血痕嘅「肉」照，令fans大喊心痛：「Hana受傷了。」不過唔使擔心Hana住，佢話唔係受傷，只係去咗做刮痧啫，fans唔使恐慌，佢仲好好，工作如常。
不過其實佢日前真係遇上一件驚險事，就係屋企個電掣漏電，搞到成屋停電，喺咁熱嘅天氣下，冇電等如冇冷氣，真係隨時會「熱死寶寶」！好在幾個鐘頭內，有師傅上門幫佢維修，好快就有番電，佢話：「真係都幾麻煩，屋企第一次漏電，都唔知點處理好，好在自己冇電親！（咁雪櫃啲嘢食咪臭晒？）咁又冇，因為立即搬咗去朋友度，只係成間屋黑晒啫。」
問到近日喺酷熱天氣下拍劇，會唔會覺得特別辛苦？Hana話拍劇一啲都唔辛苦，仲覺得好好玩添，同埋都唔擔心中暑，皆因會帶定涼茶開工，同埋好好彩，多數係開夜班，唔使同陽光玩遊戲！
東網網站 : https://on.cc/
東網Facebook專頁 : https://www.facebook.com/onccnews/
