【體路專欄】返嚟啦！開波啦！隨著德甲成功重啟比賽，歐洲各大聯賽相繼宣布重新開波，西甲喺6月11日展開第28周賽事；英超喺6月17日展開第30周賽事；意甲喺6月20日展開第27周賽事，唔知各位球迷最期待邊一場賽事呢？暫時各個聯賽最新形勢又係點？即刻話你知。
拜仁誓衛冕 護級夠混亂
德甲復賽後關鍵一戰莫過於榜首拜仁慕尼黑大戰「二哥」多蒙特，最終拜仁慕尼黑以1:0僅勝(詳情可參閱上星期文章【拜仁捕「蜂」 續領群雄】 )，擴大積分優勢至7分，最快贏多2場就可以封王。來屆歐洲賽方面，只有利華古遜有機會挑戰RB萊比錫及慕信加柏嘅歐聯資格席位；禾夫斯堡、賀芬咸以至第10位史浩克04力爭歐霸盃外圍賽資格，不過，值得一提嘅係史浩克04累計10場不勝，情況令人擔心。降班區域方面，柏達邦大有機會成為第一隊鎖定降班球隊，雲達不萊梅、杜塞爾多夫及緬恩斯處於水深火熱狀態。
紅軍終圓英超夢 取消降班變落空
英超復賽後，全數閉門作賽喺英國本土電視直播，自英超 1992 年成立首次有免費電視台直播英超賽事。講到最期待最開心，梗係一班利物浦職球員同球迷，距離高舉英超冠軍寶座又邁進一大步。歐洲賽方面，曼聯、狼隊、錫菲聯同熱刺除咗需要爭逐來屆歐霸資格賽外，亦有機會直接挑戰第4位車路士嘅歐聯席位。降班區域方面，諾域治成降班大熱門，韋斯咸、屈福特及般尼茅夫同得27分排第16-18位，連同第19位嘅阿士東維拉，大家都要加把勁先可以脫離降班區域。
巴塞皇馬有排鬥 榜尾分子無得唞
西甲復賽第一擊就上演塞維利亞打吡戰，西維爾主場出擊迎戰貝迪斯，前者需要力保前4位置，再無任何失分空間。冠軍爭奪方面，巴塞隆拿以2分領先皇家馬德里，餘下賽程仍然充滿變數，雙方歐聯戰況或會成為其中一個關鍵因素。來屆歐洲賽方面，由第3位西維爾至第7位華倫西亞相差5分，令歐聯同歐霸資格席位爭逐非常激烈。降班區域方面，由第15分華拉度列至第19位利根尼斯有6分差距，真係未到最後一場都未知鹿死誰手，從分數足以反映今季西甲賽事競爭性比起過往更加緊湊。
祖記拉素爭到尾 降班球隊有轉機
意甲情況同西甲有啲類近，兩頭馬車爭奪冠軍，3-5支球隊競逐來屆歐洲賽席位及力抗墮入降班漩渦。榜首祖雲達斯暫時稍微以1分領先拉素，雙方將會喺7月21日正面交鋒，而最後一周賽事祖雲達斯主場迎戰羅馬，拉素作客激戰拿玻里，論餘下賽程祖記稍為秤先。歐洲賽席位方面，歐霸外圍資格賽爭奪較為激烈，由第6位拿玻里至第10位博洛尼亞相差5分，各隊仍有機會衝擊歐洲賽事。護級形勢方面，榜尾布雷西亞及史帕爾情況非常危險，由第14位烏甸尼斯至第18位萊切只有3分之差，降班席位去到季尾分分鐘仲激烈過爭冠軍。
《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/
