阿仙奴近5場賽事4勝1和,球隊狀態甚佳。(Photo Credit:Arsenal Twitter)

【體路專欄】對青年球員嚟講,最珍貴同重要非出場機會莫屬。阿仙奴自從改由領隊阿迪達上任後,明顯地重視球隊青訓工作,為青年球員提供一定上陣機會,包括薩卡、祖斯夫韋歷克、基迪亞、域斯尼爾遜等。當中薩卡備受重用,復賽後7場比賽有6場正選出戰,對狼隊比賽更射入職業生涯第1個英超入球,以18歲303日成為球隊史上英超第2位最年輕入球球員,僅次於張柏倫嘅18歲173日。

薩卡(左)復賽後表演出色,帶領球隊向前列份子步步進逼。(Photo Credit:Arsenal Twitter)

身形矮小有速度 頭腦靈活轉數高

青年球員初出道最緊要勇敢嘗試,唔好怕失敗,因為你失敗,都係大家預料中嘅事。所以,一有機會就要好好把握,無論踢咩位置都好,都要盡你最大能力去表現自己。薩卡起初擔任左翼及左閘,到現時右翼及左右進攻中場都踢過,即使踢唔同位置,從來毫無怨言,場上表現完全反映佢每一場都係進步當中。雖然薩卡身形較為矮小,但速度、爆發力及決定性等絕不遜色,而深厚傳控球技術令佢能夠勝任中前場多個位置,目前情況更成為球隊中前場不可或缺嘅突破點。

薩卡(左)以表現說服領隊及隊友,現時成為隊中重要一員。(Photo Credit:Arsenal Twitter)

覆蓋範圍夠晒大 後上入楔好鬼快

現今球員除咗需要攻守兼備外,體能、身體對坑性、足球知識及心理質素等全部缺一不可。薩卡喺球場上經常滿場飛,踼閘位同翼位能夠同時參與進攻同防守都係非常基本。較早前阿迪達安排佢踢靠左進攻中場,當左翼奧巴美揚內切移到中鋒位嘅時候,薩卡就會移到邊路以左翼姿態出現,球隊即時由4-3-3陣式變為4-4-2,整體效果非常不錯。此外,佢嘅跑動令中前場充滿活力,周不時會後上殺入禁區搵入波機會。無波跑動(Off Ball Movement)不但能夠為隊友製造更多空間,重可以擾亂敵方防守位置,為球隊爭取更大進攻利益。

奧巴美揚(左)絕對能夠令薩卡昇華到另一個層次。(Photo Credit:Arsenal Twitter)

學海無涯,人總要不斷保持學習先可以增值自己,要變得更強嚟應付每一場硬場。薩卡前途一片光明,必須要保持謙卑之心繼續學習,只要比賽經驗逐漸增加,場上表現就會愈嚟愈穩定,相信薩卡將來一定會成為球隊核心,帶領兵工廠重返巔峰!

《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/

Comment 0

    最多留言