黎耀祥喺《殺手》由頭打到尾,有好大突破,出嚟效果都好滿意。
祥仔為套劇操到人生最Fit,地獄式操肌下得返140磅。
劇中祥仔由頭打到尾,頭一集就要一打十,身手唔錯㗎!
劇中仲有唔少「肉搏」鏡頭,包括觸及龔嘉欣個胸。
跑到膝頭都腫埋,祥仔要睇醫生。
第一集同辣妹埋身激咀,祥仔話朋友反應好大。
劇中同妓女江美儀有感情戲,兩人好有交流。

56歲黎耀祥為《殺手》操到鋼條身形,劇中佢飾演好打得嘅「兜踎殺手」閻武,全程冇用替身,由頭打到尾,對佢嚟講絕對係突破,祥仔形容拍到幾乎攞埋條老命,有幾次更加辛苦到令佢好擔心過唔到嗰日:「諗都諗唔到,50幾歲人先行緊五行欠打運!」採訪:方騫平黎耀祥從來未試過為拍攝打得咁厲害,形容今次係終極一戰:「其實當初諗住唔再同TVB續約,keep返自由身,但《殺手》無論喺題材、創意、監製誠意都數一數二,就係因為呢套劇續返TVB部頭合約。不過,接劇時我只知道故事大綱,唔太知細節位!」
操肌好苦
祥仔形容睇見通告嗰刻好驚,因為兩日先拍得一場打戲,「肯定打得好細緻,所以嗰排震住出去開工,最慘追逐戲又多,跑到連膝頭都腫埋,又冇時間睇醫生,唯有腫住嚟拍,就住跑半條街,跑完打完,彎身綁鞋帶時,啲汗係咁由個頭滴落地。」祥仔笑言以前多數拍文戲,最多搞笑扮吓籮記,從未試過咁辛苦。但佢都覺得開心,「唔辛苦出嚟嘅嘢係唔會好睇,真係有目標先可以鞭策到自己,做啲從來未做過嘅嘢,加埋刻苦操肌,太辛苦喇,唔好再試。」
祥仔大讚睇劇好大滿足感:「畀人打到飛起,畀個安慰獎我都好呀,當然想再奪視帝,或者頒個『老飛躍進步獎』都唔錯,獎項代表住台前幕後功勞,唔係一個人嘅榮耀。」

Comment 0

    最多留言