林芊妤和陳倩揚昨日分別帶囝囝翟伯伯和囡囡Aurella去拍片。
翟伯伯第一次見Aurella就主動拖實對方……
仲帶Aurella睇風景,好浪漫……
之後更「跪地求婚」,兩位媽咪睇到好開心。
林芊妤慫恿囝囝攬「女朋友仔」……
不過Aurella好怕醜,即刻推開。
連林芊妤都笑「未來新抱」唔騷囝囝。
其實翟伯伯同Aurella都幾有夫妻相(笑)
陳倩揚爆囡囡第一次同兩個哥哥以外嘅男仔拖手仔。

「翟伯伯」翟德彥進入「引退KOL界」倒數階段,媽咪林芊妤(Coffee)近日密密Po囝囝萌照,幫一眾「伯伯粉」慢慢搣甩鋪癮。昨日Coffee帶囝囝去拍片,同場仲有一個小女孩,那就是陳倩揚(Skye)的細女Aurella。事後,她於社交網上載一條現場花絮片,並留言:「今日帶埋BB去拍片,點知原來佢比我想像中主動,第一次見就拖姐姐隻手仔,之後仲要認真到求婚。」片中,1歲多大的翟伯伯居然一路拖實Aurella,就算媽咪拉走、B女逃走,他都唔願放手,仲拖住對方行近窗邊一齊睇風景,之後更忽然向Aurella「跪地求婚」!看見此情此景,兩位媽咪都興奮都尖叫狂笑,Skye即同「未來女婿」笑說:「唔使咁快(求婚)住,可以認識耐啲先㗎。」Coffee亦打趣道:「唔好咁心急,而家唔係以前年代盲婚啞嫁,我哋有多少少時間,唔好咁快落訂呀,睇定啲先!」不過翟伯伯就懶理兩位家長,仲一度想拖走Aurella遠離二人,冇晒符的Coffee後來索性幫囝囝催谷這段「姻緣」,直接慫恿翟伯伯給Aurella一個「愛的抱抱」,惜Aurella比較怕醜,一手推開對方,連Coffee都搞笑留言:「有新女朋友,但女朋友好似唔騷佢。」而Skye就爆料:「妹妹第一次同兩個哥哥以外嘅男仔拖手仔……有啲怕醜𠻹,威猛彥彥細妹妹三個月好有哥哥風範呀。」認真爆笑!

Comment 0