留家抗疫好多時喺屋企煮個麵就算，不過煮麵都唔一定頹，近日有唔少商家引入外地嘅高質麵食，方便大家儲糧之餘，亦一解港人次次去旅行都要大批掃入當地麵食嘅心癮。CONY最近喺超市入手咗幾款由台灣和日本直送嘅麵食，當然要同LINE TODAY讀者分享食評啦。
即食老字號牛肉麵
其實近年台灣有唔少品牌都有出真空包裝嘅牛肉麵，入面有齊湯包、麵條，仲有一塊塊真牛肉，而喺呢個時勢冇得飛去台灣，呢類「即食牛肉麵」算可以止下癮啦。而今次CONY試嘅係由當地牛肉麵老字號「玖伍」推出嘅急凍版「紅燒牛肉麵」及「麻辣紅燒牛肉麵」，湯包入面有幾件牛腱，全部都好厚肉，仲配埋秘製辣醬和雪菜，等你食落更加惹味，亦有啖啖台灣風情。
▲紙盒內有一大包湯底連牛腱、麵條、雪菜及辣醬。
▲將湯包放在滾水加熱5分鐘，再煮熟麵條就完成一碗香噴噴的台式牛肉麵。
▲湯底內有5、6件牛腱，而且件件都好厚肉，口感軟稔又帶膠質，令人滿足！而經急凍過嘅鮮製粗麵味道會冇咁香，但保持到煙韌口感，配埋雪菜一齊食就更加惹味。
台灣星級拌麵
講到台灣麵食，又點少得拌麵？CONY次次到台灣都會搬一堆返香港。而今次試食嘅呢款「山喜屋詹姆士麵」CONY之前就未食過，但聽聞佢喺「台灣星食榜2019百大拌麵12強專業評鑑」獲得「特優」評級，有一定嘅實力。佢哋仲有推出多款口味，今次CONY買咗「激麻拌麵」同「茄燒湯麵」，前者麻勁十足而且唔辣，後者雖然係全素，但湯底濃郁亦有層次。
▲激麻拌麵及茄燒湯麵分別內含調味包及麵條，而兩款口味所用嘅麵條都唔一樣。
▲將幼麵條以醬油、花椒油及花椒粉拌勻，因此麻而不辣，香氣十足。麵條口感唔算十分彈牙，但勝在滑溜。
▲茄燒湯麵煮好咗個樣有少少似麻辣湯麵，而食落都有輕微辣勁。講真番茄味唔算突出，但因為用上大量香料如薑、花椒、八角、豆瓣醬等製成湯底，味道濃郁具層次，而且麵條吸湯力不錯，可以話係重口味嘅素湯麵。
超清爽日式冷麵
天氣悶熱唔想食熱辣辣湯麵？CONY跟住介紹嘅呢款日式麵食你一定要注意啦。由日本著名即食麵品牌Tabete推出夏季限定嘅「瀨戶內產檸檬鹽味拉麵」，將麵條煮熟之後過冷河，再放入用凍水稀釋咗嘅特製檸檬鹽醬內，涼快得嚟，超香濃嘅檸檬味仲為你帶來超清新快感，嘆住冷氣食一流。
▲打開包裝，入面嘅食材好簡單，有檸檬鹽醬料包同麵條。
▲除咗湯底味道勁清爽，麵條亦值得一讚，口感爽口彈牙。
營養滿分無添加米粉
台灣嘅米粉同我哋平時食開嘅米粉有少少唔同，會更幼身同爽口，而「老鍋米粉」係台灣老字號，近年積極將品牌年輕化，製作米粉時仲加入唔同在地食材如南瓜、芋頭、紅蘿蔔及牛蒡等，其實食落味道同普通米粉差唔多，蔬菜味唔會特別突出，因此可以配搭唔同食材同煮法，但就更添營養，而色澤睇落仲更加吸引㖭！
▲米粉內不含調味包，可以用嚟做湯麵、乾拌或炒都得。今次CONY試整南瓜味湯米粉，南瓜味唔太明顯，不過麵質爽口，完全係台灣食到嘅風味。
銷售點：全線一田（玖伍牛肉麵只限沙田、觀塘、元朗及將軍澳分店有售）
