港姐冠軍馮盈盈樣靚身材正，而且性格爽朗、敢作敢言個性成為唔少宅男心目中女神。尋日喺主持嘅無綫節目《#後生仔傾吓偈》，以「市場調查」為理由，問一眾後生仔女「價錢」時，黃凱儀（波波）就話不時收到訊息邀約，仲透露試過以每小時五位數開價，波波笑言：「對方話唔使做，我同朋友講笑話可以同佢搭巴士過東隧，塞車都起碼大半個鐘！」
其實馮盈盈之前喺節目都透露過被問價，對方竟然出價5百蚊問過夜得唔得，嬲到佢即刻封鎖網民，尋日佢重提舊事，笑言：「大家都係5，點解波波有5位數，我就得5百？其實個價真係冇想像中咁高。」不過佢之後都透露試過被開價20萬去旅行，不過就未有透露當中需要做啲咩。
前主持麥明詩曾於節目中自爆被問價500萬過一晚，而芷欣則試過被出價以3至5千蚊收購底褲，孔德賢（Danny）雖然係男仔，但亦試過被男粉絲出價以5百蚊收購有味道嘅運動襪，真係咩人都有呀！
另外，有網友睇完節目大嗌該煨，覺得唔應該拎呢啲嘢出嚟講，又有網友覺得只係笑料一則，唔使太認真！
東網網站 : https://on.cc/
東網Facebook專頁 : https://www.facebook.com/onccnews/
