甩拖近半年嘅前港姐冠軍馮盈盈疑似暗撻賭王何鴻燊四房公子何猷亨，仲被東網拍得不避嫌貼到實上億元遊艇開P蜜會，自行「踢爆」同緋聞男友鄭衍峰係煙幕！新聞一出，馮盈盈嚇到腳仔軟，仲拖埋當日有份上船嘅江嘉敏落水添！
馮盈盈回覆東網時，指與猷亨係靠江嘉敏介紹先識：「我要澄清我們絕對不是發展中，其實當日遊船河江嘉敏也在，我和猷亨因為嘉敏介紹才認識，我們只是純粹朋友關係，大家不要想多😅🙏🏻（係咪眼中只有對方？）絕對唔係呀。係相中我望都無望過佢😂只係角度問題，大家猜錯喇🙈（同衍峰派定心丸？）無需要啦😌」而馮盈盈更豪晒同江嘉敏當日嘅合照。
而另一孤獨男主角鄭衍峰，就忽然以一副「正印」口脗回覆東網，直言馮盈盈已一早「報定案」，夾晒口供一齊「篤」江嘉敏出嚟：「係啊！盈盈同我講過話江嘉敏叫佢去Boat Trip，之後，盈盈同我提過話Boat Trip江嘉敏介紹猷亨同埋其他朋友畀佢識。好正常暑假出海！同Fyy（馮盈盈）係朋友，都多謝你哋寫我上呢個輕量級大戰重量級擂台！」
東網網站 : https://on.cc/
東網Facebook專頁 : https://www.facebook.com/onccnews/
