由黎耀祥（祥仔）與陳豪兩大視帝主演，陳維冠監製嘅無綫新劇《殺手》已啟播， 56歲的祥仔喺首集經已相當矚目，除由頭打到尾，仲有唔少火辣辣場口。至於傻氣嘅貪錢單親媽媽李佳芯(錢向茜)；剷晒青「癲癲哋」嘅龔嘉欣(NaNa)跟平日戲路反差好大，劇中好有發揮。陳維冠仲保證，李佳芯係女主角，戲份冇變過。採訪：方騫平
雖然黎耀祥已變TVB部頭藝員，但他依然落力，劇中有唔少喪跑同狂打場口，第一集仲有得攬啜低胸辣妹兼且頭壓女方胸口！陳監製大讚祥哥好盡力：「全劇佢同龔嘉欣打得最勁，佢哋都盡量唔用替身。除此之外，祥哥仲為咗呢套劇好辛苦咁操練6嚿腹肌，我睇住陳豪教佢點樣食嘢Keep Fit，連佢老婆都要求佢Keep耐啲個Body，佢就耍手擰頭話唔得，Keep唔到喇。」
龔嘉欣拍到喊
編審蔡婷婷指龔嘉欣向來角色係賢良淑德，好難將佢同神經質、兇狠拉上關係，今次完全唔同晒，陳監製對她要求好嚴格，拍前3個月先接受武打訓練，要她打得又演得：「有日佢喺旺角同祥哥、樊亦敏拍外景，因為快天黑，唯獨佢拍唔到我要求嘅表情，佢做極都做唔到，仲要駁嘴，所以我就鬧佢，佢NG到喊。」至於李佳芯唔再賣靚樣：「佢成日做有自信嘅專業人士，有啲悶喇！今次佢做到精靈之餘帶啲傻氣嘅師奶仔。」問到李佳芯有否受雪藏風波影響到戲份？陳維冠強調劇集剪好後交由公司安排，冇再刪剪她戲份，仍然係第一女角。」
