夏日炎炎，想行山郊遊但又可以遠離人群聚集的熱門行山點？大家不妨考慮到綠蛋島。綠蛋島又叫「爛排」，位於清水灣大嶺峒東面海域一帶嘅石礁排，由於島形好似一隻綠色蛋黃的荷包蛋，所以又名為「綠蛋島」，亦係近年興起的浮潛熱點之一。
前往綠蛋島嘅路線並唔容易，人煙罕至，甚少被污染，有別於一般沙灘島嶼，特別水清沙幼，睇起嚟好似玻璃一樣咁清澈，感覺好似去了歐洲小島一樣，隨處都可以拍到好靚嘅美景。想有個好似去外地旅遊嘅假日，又唔怕攀山涉水，避開人潮，不妨選擇到呢個隱世小島 ，一定會令你樂而忘返。
前往綠蛋島方法:
想登上綠蛋島有三種方法，分別有行山路、扒獨木舟或租船前往。
1)選擇行山嘅朋友可以從龍蝦灣或大坳門走約3小時山徑，要注意路上雜草叢生，沒有清晰路線，沿途要靠周邊繫上嘅絲帶作指引。記住要帶足夠嘅水及防曬裝備，因為路途遙遠而暴曬時間較長。
2)選擇扒獨木舟前往嘅朋友，可以考慮由相思灣岀發，該處有Kayak同Canoe租借，兼且靠近綠蛋島，扒大概45分鐘就會到達。提提各位要預早租借獨木舟，旺季期間起碼要提早一個月前預訂。
3)租船亦係由相思灣岀發，通常要5人以上成行，由於限聚令最新規定收緊至2人，所以暫時都難以租船出海。講返船程大約10至15分鐘，呢個方法最快捷，適合想帶重裝備浮潛嘅朋友選擇。
筆者選擇行山方法，畢竟行山路可以隨意選擇鍾意嘅景色，停落嚟慢慢欣賞。沿途見清晰嘅海灘，吸引到我哋攀岩而下，增加多個美景打卡位。
蔚藍天空配上閃爍碧海，有如置身外國度假小灘一樣。望住一望無際，無污染嘅海灘，真係舒服到唔想離開。
攀岩上落，雖然少啲體能都唔得，但見到不一樣嘅美景，總算值得。
經過三小時行山路徑，終於到達隱世小島——「綠蛋島」。提提各位前往小島要查清楚潮漲潮退時間，因為只有潮退時先可以從沙堤直接行到綠蛋島。如果潮漲就只能涉水或游水通往。
呢度有幾個「貴妃池」，充滿以前積累嘅雨水。要注意池底充滿尖石同滿布黑色青苔，所以步行時要特別小心滑倒，同埋記得著上防滑鞋。
水質清澈見底，深淺程度嘅藍色顯而易見。不過聽朋友複述，喺浮潛期間見到海洋生物唔多，反而見到好多棄置鋁罐，希望珍惜大自然嘅朋友，可以將外來垃圾帶走，保持島上生態環保。
香港其實有好多好美麗嘅地方，疫情之下去唔到外國，留返喺本土仍可以發掘唔少秘景同隱世小島。
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
