人人身邊都總有一兩個cheap精朋友，佢哋嘅cheap皮行為未必會令人損失好大，但係就硬係好似有隻蚊久唔久針下你咁煩煩哋，佢哋未必係一心想累你，但係真係唔可以縱容囉！
毛病1： 側側膊賒數
食飯埋單時佢梗係話無帶銀包、無現金、陣間㩒機俾返你等等，呢啲情況通常就係拖到不了了知。
辣招：
佢可能真係唔記得咗，但你又唔好意思不斷係咁追佢，下次約食飯不妨全體一齊下載啲「俾錢」 app，或者預先提定每一個人記得嚟之前攞定大約幾錢現金；或者有理無理，下次食飯俾錢時，叫佢埋單，順便扣返上次條數。
毛病2： 搬搬抬抬唔見人
大圍去玩，要幫手買嘢準備、設計路線、約人、搬搬抬抬，有啲朋友總係好似人間蒸發咗咁；朋友有急事，佢總係有其他事嚟唔到（唔係一次半次，係好多次）。
辣招：
佢未必係唔關心大家，但係就係唔係好願意/習慣付出，如果你仍然想keep呢個朋友，下次gathering直情直接指派一項任務俾佢，例如食完飯佢負責洗碗，等佢分享一下為人人服務嘅快樂。
毛病3：明借明唔還
佢未必一次借好多，可能就係3幾百咁借下借下，由於數目少，佢反而唔在意去還，呢個世界亦真係有啲人以為你唔等錢使先借錢俾佢，所以佢都大安旨意唔急住搵錢還，或者佢成長環境唔同，未理解到人哋將積蓄借俾人嘅心情。
辣招：
唔好隨便借！盡量offer錢以外嘅幫助，有時反而係更大嘅幫忙。推嘅時候唔使覺得難為情，直接俾佢知道你都有難處或者解釋你因為珍惜大家關係先唔想搞複雜咗。
