見到CHOCO尋日咁招積有得食梳乎厘班戟,今日CONY即刻要嚟個反擊!為大家介紹一間抵食又正宗嘅拿坡里pizza餐廳,等大家喺今個周末食盡好西。
好多人都知道pizza係意大利菜,但就未必知平時食開嘅其實大多係美式pizza。咁拿坡里pizza先至係正宗嘅意大利pizza?又唔可以咁講,因為拿坡里pizza只係意大利pizza嘅其中一種。話晒成個意大利咁大,不同地區的天氣和農產都有分別,就好似中國都有分多個菜系,而意大利亦同樣,唔同地區整嘅pizza都各有特色,所以所謂正唔正宗,都要睇吓嗰款係乜嘢pizza,而唔應該以拿坡里pizza嘅特色作準則。
跟住當然要講吓究竟乜係「拿坡里pizza」?同平時食開嘅pizza有咩分別?其實拿坡里(Napoli)位於意大利南部,而當地整嘅pizza最大特點係用窯爐只烤約90秒就搞掂,而平時食開嘅pizza餅底厚到好似麵包咁,但拿坡里pizza嘅餅底雖然有厚厚嘅批邊,但餅底較薄,口感就煙韌帶脆,食幾件都唔會覺得滯。鋪面嘅食材就好多元化,但最經典嘅口味就一定係Margherita(番茄醬、水牛芝士、羅勒葉)和Marinara(番茄醬、蒜頭、牛至)。
講返今次介紹嘅呢間餐廳Ciao Chow,兩年前喺中環開幕,係全港第一間亦係唯一一間攞到拿坡里pizza權威認證Verace Pizza Napoletana( VPN)嘅餐廳。VPN認證係意大利拿坡里當地為咗確保拿坡里pizza嘅質素而成立,不論是食材、做法、器材等方面均有嚴謹規定,好似麵粉一定要用00級數,窯爐款式、使用的酵母,甚至是用來調味嘅鹽都有所規定。
Ciao Chow中環店開喺蘭桂芳,自然走較高級嘅路線。後來佢哋喺又一城開設分店,估唔到定價較低之餘更不設加一,而食物質素同中環店差不多,加上喺名店兼高級食府林立嘅又一城,嗌滿成枱,埋單每人約100至150蚊左右,Ciao Chow算係好抵食。
經典嘅Margherita當然係必食之選。酸甜有致嘅番茄醬,仲有大量水牛芝士同羅勒葉,簡單美味。除此之外,卡邦尼pizza都係呢度嘅招牌菜,完全將卡邦尼意粉嘅用料搬字過紙,就連最能將整道菜畫龍點睛嘅溫泉蛋都有,呢個冇得輸嘅組合,集細滑、鹹香和蛋香於一身,變身成pizza版都一樣好食。
另外BBQ Chicken pizza用上秘製燒烤醬、雞胸肉、紅洋蔥等,惹味十足,而雞胸烤得嫩滑濕潤,值得一讚。除咗鹹批之外,佢哋嘅甜品「香蕉榛子醬薄餅包」都係亮點之作,外脆內軟嘅薄餅包住滿滿嘅nutella同香蕉,超級邪惡!
呢度除咗pizza之外,仲有意粉食,不過相比pizza就失色好多,所以不多介紹。反而小食不錯,尤其香脆焗薯粒同炸魷魚圈,而且飲品種類不少,除咗啤酒、汽水、咖啡之外,仲雲集多國特色飲品例如珍珠奶茶、泰式奶茶同越南咖啡等,幾跳脫!
Ciao Chow - Italian Cafeteria
地址:九龍塘達之路80號又一城UG層19號鋪
電話:2499 1000