AEON店長一直以來都不時獲網民盛讚有創意,公關技巧一流,最近一則AEON「貼堂」顧客心聲又成功在網上引起熱議。
有網民在連登討論區以「喺AEON做店長,冇返啲創意真係唔得」為題上傳一張照片,在一張顧客心聲上,有客人質問店長:「請問點解啲嘢要錢?我屋企嗰啲係免費㗎喎。你係咪以為我好好呃?要呃我錢?」內容疑似指控AEON欺騙顧客,充滿挑釁。
不過AEON店長處變不驚,親筆回覆該客:「本店是一間零售百貨公司,所有物品均需付款購買,明碼實價,童叟無欺。」再進而解釋:「閣下所指家中物品均是免費,想必是閣下的家人已付出金錢購買,而沒有向你討回相關金額。」
最後,店長更貼心提醒顧客:「請珍惜家人對閣下的關愛。」神回覆令「連登仔」都不禁大讚:「玩嘢都可以覆得好得體。」同時稱讚店長高EQ。該神回覆更獲追捧為「PR教科書」。不過亦有網民質疑炒作,指「AEON PR定期寫啲膠嘢,好快各大媒體會幫AEON宣傳。」
【LINE你睇】每日精選網絡熱話,源源送上新鮮事,LINE你睇唔驚冇話題。